纽卡素步步惊心

2018世界杯盘口 2018-10-22 21:30 阅读:179

宾尼迪斯如今喺纽卡素可谓过得相当不如意。 如果要数英超新赛季开咧至今最为闭翳嘅球队,相信纽卡素会系不二之选。

喺本轮联赛主场1球不敌白礼顿后,纽卡素开季头9轮联赛仅录得2和7负嘅难堪战绩,一胜难求嘅佢哋亦毫无悬念咁「霸占」住联赛副班长之位。成绩如此肉酸当然事出有因,其中上季嘅攻击线大腿艾约斯皮里斯喺今季状态全无,9轮过后仍然食紧白果,导致本就攻击力薄弱嘅纽卡素如今可谓雪上加霜。与此同时,由两位中坚拉素利斯和F.费兰迪斯领衔嘅防线即使未至于去到英超最差嘅水准,但显然亦无力阻止球队节节败退嘅颓势。对于弱肉强食嘅英超赛场,只要稍一不慎就会迅速陷入万劫不复之地,而问题多多嘅纽卡素好明显喺10月份就已经需要将赛季目标调整为保组。

可以讲,纽卡素主帅宾尼迪斯绝对系有料之人,但如今喺纽卡素却确实系巧妇难为无米之炊。球队班主艾殊利一向孤寒就系人都知,但喺今夏转会市场上,频频失血嘅纽卡素却并未积极进补,稍具睇头嘅引援只有日本国脚武藤嘉纪,对于军备竞赛越演越烈嘅英超赛场,要想宾尼迪斯用有限米煮出美味佳肴显然系强人所难。此前几轮联赛中,其实宾尼迪斯嘅执教功底已经有所体现,其中不乏喺梦剧场将曼联一度迫入绝境嘅「作品」。不过喺如今呢个换帅成风嘅时代中,无一个主帅可以拍心口讲自己一定可以咬住份长粮过世,因此宾尼迪斯嘅去留如今亦成为外界嘅一大焦点。

喺前9轮联赛中,纽卡素可谓一步一惊心,如今喺风雨飘渺中继续前行,尚喺帅位中苦苦挣扎嘅宾尼迪斯日子注定难过。
版权声明
本文由2018世界杯盘口整理发布,转载请注明出自纽卡素步步惊心https://www.glonly.com/fifa/28363.html